Токмок шаарынан уюшкан кылмыштуу топтун мүчөсү кармалып, жанынан “Макаров” тапанчасы жана октору алынды

Чүй облусунун ИИББдүн криминалдык милиция кызматынын уюшкан кылмыштуулукка каршы күрөшүү бөлүмү тарабынан Токмок шаарынын жашоочусунун бири мыйзамсыз ок атуучу курал сактап жүргөндүгү тууралуу ыкчам маалымат алышкан. Бул окуя кылмыштардын жана жоруктардын бирдиктүү реестрине Кыргыз Республикасынын Жазык кодексинин 253-беренеси (Куралды, ок-дарыларды мыйзамсыз жүгүртүү) боюнча катталып, сотко чейинки өндүрүш иштери башталган.

Кызматкерлер тарабынан жүргүзүлгөн бир катар ыкчам иш-чаралардын натыйжасында,  анын өздүгү аныкталган. 2021-жылдын 4-февраль күнү Чүй облусунун ИИББдүн КМКнын уюшкан кылмыштуулукка каршы күрөшүү кызматы, Токмок шаарынын ИИБдүн криминалдык милиция кызматы жана ИИМдин “Шумкар” атайын багыттагы полкунун Чүй облусу боюнча атайын отрядынын кызматкерлеринин катышуусунда  Токмок шаарынан 1975-жылы туулган А.Б. кармалган. Кароо жүргүзүү учурунда, жанынан номери өчүрүлгөн “Макаров” үлгүсүндөгү тапанча, 5 огу жана колго жасалган бычак алынган.

Кармалган жаран мурда бир нече жолу соттолуп, «Точка» каймана аталып, крим чөйрөдө «смотрящий» жана «положенец» статусуна ээ болуп,  КР ИИМдин ыкчам каттоосунда уюшкан кылмыштуу топтун мүчөсү катары турганы аныкталган.

Маалымат катары белгилеп коюучу жагдай, кармалган жаран буга чейин тоноо, ууроо, опуза талап кылуу жана мыйзамсыз баңги затын сактоо беренелери менен бир нече жолу соттолгон.

Учурда Токмок шаарынын ИИБдүн убактылуу кармоочу жайына камакка алынган. Сотко чейинки өндүрүш иштери улантылууда.